बीडच्या अंबाजोगाईत सेवानिवृत्त शिक्षिकेला डिजिटल अटक, विश्वास नांगरे पाटलांचे नाव घेत भामट्याकडून ८३ लाखांचा गंडा
पोलीस महानगर नेटवर्क
बीड – राज्यात मोठ्या प्रमाणावर सायबर गुन्हेगारीत वाढ झाली आहे. अशीच एक घटना घडली आहे. अंबाजोगाईत एक धक्कादायक घटना उघडकीस आली असून, एका सेवानिवृत्त शिक्षिकेला व्हॉट्सॲप कॉलवरून ‘डिजिटल अटक’ केल्याचा प्रकार घडलाय. सेवानिवृत्त शिक्षिकेला मनी लॉन्ड्रींग आणि अतिरेक्यांना फंडिंग केल्याचं सांगत तब्बल ८३ लाख रुपयांना गंडवण्यात आलं आहे. चौकशीला सहकार्य करा सांगत फसवणूक करणाऱ्या भामट्यांनी “विश्वास नांगरे पाटील यांचे नाव घेत ही फसवणूक केली आहे.
विश्वास नांगरे पाटलांचे नाव सांगत फोन केला
अंबाजोगाई येथील सेवानिवृत्त शिक्षिकेला मनी लॉन्ड्रीग आणि अतिरेक्यांना फंडिंग केल्याचे सांगत चौकशीला सहकार्य करा असे म्हणत व्हॉट्सॲप कॉल वरून तब्बल ८३ लाख रुपये हडपल्याचा प्रकार अंबाजोगाईत झाला आहे. तुमच्या आधार कार्ड वरून दुसरे सिम कार्ड घेतले असून त्याचा दुरुपयोग झाल्याचे देखील बनावट कॉलद्वारे सांगण्यात आले.आम्ही तुम्हाला या प्रकरणातून सोडवू, यासाठी आम्हाला विश्वास नांगरे पाटील यांनी स्पेशल विनंती केल्याचे देखील निवृत्त शिक्षिकेला फोन केलेल्या भामट्यांनी सांगितले.
सोनं, प्लॉट गहाण ठेवत कर्ज काढलं अन्
संजय पिसे नावाच्या व्यक्तीने व्हाट्सअप व्हिडिओ कॉल करून आधी या निवृत्त शिक्षिकेला मुंबई पोलिसांचे बनावट ऑफिस, झेंडे, लोगो दाखवून डिजिटल अटक केली. त्यानंतर भीती दाखवून २१ ते २९ मे या दरम्यान तब्बल ८३ लाख १ हजार ८१६ रुपये उकळले. विशेष बाब म्हणजे निवृत्त शिक्षकेने भीतीपोटी सोने प्लॉट गहाण ठेवून त्यावर कर्ज काढत ही रक्कम दिल्याचे सांगितले. ३० मे रोजी गुन्हेगारांनी व्हाट्सअप वरून ब्लॉक केल्यानंतर त्यांना त्यांची फसवणूक झाल्याचे लक्षात येताच त्यांनी सायबर पोलीस ठाणे गाठत फिर्याद दिली त्यानुसार शनिवारी सायबर पोलिसात गुन्हा दाखल करण्यात आला आहे. या प्रकरणाचा तपास सायबर पोलीस करत आहेत.
